Германски железници (Deutsche Bahn DB) ги воведоа првите долгорочни забрани за користење на нивните превозни средства за луѓе кои одбиваат да носат заштитни маски, објавија вчера германските медиуми.
„DB воведе забрана за продажба на своите услуги на повеќе од десет лица поради повеќекратно одбивање да носат заштитни маски“, изјави портпарол на концернот за весникот Welt am Sonntag.
На овие лица им е забрането да ги користат услугите на DB во меѓуградскиот и локалниот сообраќај во следните шест месеци, а исто така им е забрането да влегуваат во железничките станици низ целата земја.
Поголемиот дел од луѓето на кои им е изречена забраната за превоз се дел од групи кои го негираат постоењето на пандемија на коронавирус. Во декември тие објавија видео на социјалните мрежи во кое се движат без заштитни маски во вагон на DB и ги малтретираат патниците со маски.
Во случај на непочитување на изречената забрана, DB се подготвува да поднесе кривична пријава за влегување на приватен имот.
Во Германија, од воведувањето на првите мерки за борба против пандемијата на коронавирус минатата пролет, се разви сцената Querdenker (во слободен превод: оние што размислуваат „надвор од кутијата“), составена од луѓе кои се противат на мерките и редовно го негираат постоењето на пандемијата.