Најчеста вагинална инфекција кај жените е бактериската вагиноза.
Според Центрите за контрола и превенција на болести (CDC), оваа состојба погодува речиси 30 отсто од жените на возраст меѓу 15 и 44 години. Се јавува кога има прекумерен раст на бактерии, што ја нарушува природната pH рамнотежа на вагината.
Одредени фактори на ризик за развој на бактериска вагиноза се испирање на вагината, бременост, нов сексуален партнер, женски сексуален партнер или повеќе сексуални партнери, некористење на кондом или интраутерина направа. Може да ѝ се случи на секоја жена, дури и сексуално неактивна, иако таква појава е ретка.
Не постои безбеден начин да се избегне бактериска вагиноза, но може да го намалите ризикот со тоа што нема да ја испирате вагината, да ги ограничите сексуалните партнери, да користите латекс кондоми и да носите памучна долна облека.
Кои се симптомите на бактериска вагиноза?
Понекогаш нема никакви симптоми, а доколку ги има, тие најчесто вклучуваат валкано бел, сив, зеленикав, воден вагинален исцедок и мирис на риба кој може да биде посилен за време на менструацијата или после секс. Помалку чест симптом е чешање или болка, изјави д-р Џенифер Видер за Yahoo News.
Бактериската вагиноза не е сексуално пренослива инфекција, но може да го зголеми ризикот од добивање сексуално преносливи инфекции, како што се кламидија или гонореја, според CDC. Ова, пак, може да доведе до воспалителна болест на карлицата. Ако имате бактериска вагиноза додека сте бремени, тоа исто така го зголемува ризикот од предвремено породување (пред 37-та недела од бременоста).
Како се лекува бактериската вагиноза?
Добрата вест е дека оваа состојба е излечива. Инфекцијата се дијагностицира со земање примерок од вагинална течност при гинеколошки преглед и лабораториска анализа. Терапијата обично вклучува земање антибиотици.
Студија од 2021 година покажа дека бактериската вагиноза ќе се повтори во рок од шест месеци во повеќе од 50 проценти од случаите. Затоа е важно да земете цела доза антибиотици и да се обидете да спречите враќање на инфекцијата.
Бактериската вагиноза се смета за блага инфекција, но може да ве направи поподложни на сериозни здравствени состојби. Ако почувствувате некој од симптомите, не ја одложувајте посетата на гинеколог.