Милијардерот Илон Маск го купи Twitter и веднаш ги отпушти директорите од компанијата. Тие ќе добијат отпремнина во износ од 122 милиони долари.
Тројцата главни раководители на Twitter ќе добијат исплати за прекин на договорот во вкупен износ од околу 122 милиони долари, соопшти истражувачката компанија Equilar.
Маск го отпушти Параг Агравал, главниот извршен директор на Твитер, како и главниот финансиски директор Нед Сегал и шефицата за правни работи и политика Виџаја Гаде. Ги обвини дека го довеле до заблуда него и останатите инвеститори за бројот на лажни профили на оваа платформа.
Како одговор на прашање од Reuters, истражувачката компанија Equilar процени дека Агравал ќе добие 57.4 милиони долари, Сeгал 44.5 милиони долари, додека 20 милиони долари ќе завршат за Гаде.
Од Twitter не ја коментираа оваа анализа.
Покрај овие исплати, тројцата извршни директори ќе добијат вкупно 65 милиони долари од Маск како замена за нивните акции од компанијата.
Во исплатата се вклучува и 100 проценти од годишната плата, премии за здравствена заштита, плус бонус за брзо преземање. Според Equilar, отпуштените директори би требало да ги добијат овие исплати, освен ако Маск не би имал добра причина за раскинување на договорот. Причина за тоа во вакви случаи обично е затоа што е прекршен законот или политиката на компанијата.
