Вработените во националната Пошта пред две недели почнаа со секојдневни предупредувачки протести барајќи првенствено исплата на платата за септември. Протестите се одржаа во тек на паузите во подружниците на поштенското претпријатие во подружниците во Скопје и низ државата.
Минатата недела, на 26 октомври, на средба на министерот за транспорт и врски Благој Бочварски и директорт на Пошта Васко Стефанов со претставници на синдикалните организации во поштенското претпријатие Боро Велигденов и Младен Стојановски, придружувани од претседателот на ССМ Дарко Димовски, беше договорено протестот во националната Пошта да се стави во мирување, да се исплати платата за септември, а за наредните месеци да се исплаќа во законски предвидениот рок, до 15-ти во месецот.
Требаше да дојде следниот понеделник за да почне Пошта да функционира, секако, по нивен терк. Корисници пријавуваат дека добиваат телефонски повици од Пошта дека немаат доволно поштари, па пратките што чекаат неиспорачани уште од пред штрајкот да си ги подигнуваат сами.
За (не)функционалноста на Пошта се зборува и пишува многу. Порталот 360stepeni.mk неодамна објави резултати од теренско истражување во кое ја ставија на тест државната Пошта на Северна Македонија, праќајќи писма и пакети до шест адреси низ Македонија за да проверат каква услуга добиваат граѓаните од државната фирма.
Според статистичките податоци на Агенцијата за пошти, во 2021 година имало 1.006 рекламации за пречекорен рок на достава и за изгубена пратка, што е зголемување на бројот на рекламации за 1,3 отсто споредено со претходната година. Најчесто, поплаките се за изгубени пратки. Пошта лани прифатила и обесштетила половина од рекламациите. Ова за директорот Васко Стефанов е незначително во однос на вкупниот број пратки во 2021 година – 30.559.811, објави порталот.
За тоа како поминале пратките во нивното теренско истражување, ве упатуваме да прочитате на 360stepeni.mk, а за незадоволството на граѓаните од услугите на Пошта, споделуваме мислења од дежурниот коректив – твитер сферата.
Зошто Македонска пошта не се модернизира, како на пример со праќање на известувања за пристигнати пратки на e-mail или преку СМС порака, наместо со картончиња кои ги разнесуваат поштари (кои очигледно ги имаат сè помалку), останува отворено прашање.
Какви се вашите искуства со нивните услуги? Колку пати ви изгубиле пакет досега?