Тренерот на Челзи Антонио Конте, во изјава за англиските медиуми истакна дека очекува поддршка од управата на клубот од „Стемфорд Бриџ“, во врска со последните шпекулации околу негово заминување од лондонскиот клуб.
Тренерот на „Сините“ смета дека клубот треба да излезе во јавноста со соопштение во кое ќе му понуди поддршка пред финишот на сезоната кој следува.
„Би сакал да добијам некоја порака за поддршка која ќе им се спротистави на сите шпекулации. Можеби клубот би можел да подготви соопштение за медиумите во кое би пишувало: „Веруваме во неговата работа“, изјави Конте, а потоа додаде:
„Давам се од себе за овој клуб, работам максимално, а ако управата на клубот сака да ми го продолжи договорот, ќе разговараме за тоа. Зошто да не?“, се запраша поранешниот тренер на „Старата дама“.
Екипата на Челзи денеска ја очекува гостување кај Вотфорд, а во последните неколку денови во англиските медиуми се споменува можноста за заминување на Конте од клупата на Челзи токму после оваа средба.
После 25 одиграни кола во оваа сезона, Челзи се наоѓа на четвртата позиција со 50 освоени поени и ако го победи Вотфорд, ќе го прескокне Ливерпул и ќе се врати на третата позиција со три поени помалку од второпласираниот Манчестер јунајтед.