Ширум Шпанија денеска се планирани митинзи во знак на протест поради минатонеделниот референдум за независност на Каталонија.
Илјадници демонстранти се очекува да излезат на улиците на Мадрид, а има повици и за контрамитинзи во Барселона и други градови низ земјата да изразат незадоволство од референдумот и да повикаат на обединетост на Шпанија.
Претставникот на шпанските власти Енрик Милјо упати извинување до сите повредени во полициските акции за спречување на гласањето на референдумот минатата недела, но исто така за нередите ги обвини каталонските власти бидејќи воопшто го одржале референдумот што власта во Мадрид го смета за противуставен.
Неколку стотици луѓе беа повредени во интервенциите на полицијата, а повредени беа и 33 полицајци.
Претседателот на Каталонија Карлес Пучдемон рече дека ќе се обрати на регионалниот Парламент во вторник, 10 октомври. Шпанскиот Уставен суд претходно го суспендираше одржувањето на седницата на Парламентот на Каталонија закажана за на 9 октомври.
Постојат шпекулации дека Парламентот на наредната седница еднострано ќе прогласи независност врз основа на резултатите од референдумот.
Според официјалните резултати, за независност се изјасниле 90% од 2,3 милиони гласачи. На референдумот излегоа 43% од гласачите.
Беа пријавени нерегуларности во гласањето, а полицијата заплени дел од гласачките кутии.
