Пауло Дибала летово ќе ги напушти редовите на „Старата дама“ како слободен играч по истекот на договорот со клубот, со што ќе се стави крај на долгогодишната сага за неговото заминување од Торино.
Медиумите во Италија пишуваат дека Јувентус и Дибала не успеале да најдат решение за неговиот нов договор, односно дека Аргентинецот не сакал да ги прифати полошите услови кои му биле понудени откако во клубот пристигнал Душан Влаховиќ.
Влаховиќ е една од главните причини зошто Јувентус нема да се труди премногу во однос на Дибала, односно поради што ќе го пушти Аргентинецот без обештетување да си замине од клубот, а сега ќе биде интересно да се види во кој клуб ќе игра Дибала и каде ќе ја продолжи кариерата, со оглед на тоа што пред неколку години беше поврзуван со сите најдобри клубови во Европа.
Челниците на Јувентус сега во центарот на долгорочен проект го гледаат Влаховиќ, а не Дибала, што беше случај порано.
Така Дибала на неславен начин ќе го заврши седумгодишниот престој во Јувентус, а за тоа време освои пет шампионски титули и четири трофеи од Купот на Италија. Тој во Торино пристигна од Палермо во 2015 година.
Во текот на кариерата во Јувентус имаше проблеми со бројни повреди, што беше случај и оваа сезона, во која одигра само 29 натпревари во сите натпреварувања и постигна 13 голови.