Најпрометната меѓународна воздушна линија на светот е Сингапур - Куала Лумпур, покажуваат резултатите од најново истражување на оваа тема.
Според истражување кое го спроведе агенцијата OAG Aviation, чие седиште се наоѓа во англискиот град Лутон, на оваа рута се забележани 30.537 летови од февруари 2017 до февруари 2018 година.
Тоа значи дека во просек се одвиваат 84 летови дневно по оваа рута.
Оваа линија го зазема првото место кое досега и припаѓаше на авиолинијата Хонг Конг - Тајпеј, на листата на која доминираат азиски дестинации, пренесува „BBC“.
Летот помеѓу Куала Лумпур и Сингапур трае околу еден час, а постојат и планови за изградба на брзи железнички пруги помеѓу овие две дестинации.
На оваа рута летаат поголем број на авиони од нискобуџетните компании како што се Scoot, Jetstar, Air Asia, Malindo Air, како и Singapore Airlines и Malaysia Airlines.
