Деновиве на неколку локации во Скопје, меѓу кои и култниот Куршумли-ан, се одржува 14. издание на фестивалот за документарни филмови - МакеДокс. Многу посетители одлучуваат да дојдат со велосипед, но се соочуваат со голем проблем - каде да се остави превозното средство.
Дворот на Куршумли-ан е простран, има и повеќе од доволно простор за да се постави нешто од кое бенефит ќе имаат многумина, а очигледно и тоа како е потребно - паркинг за велосипеди.
Деновиве, посетителите на МакеДокс кои се одлучуваат на филм да дојдат со велосипед, имаат голем проблем. Куршумли-ан нема паркинг за нивното превозно средство, па мораат да се снаоѓаат импровизирајќи. Како велопаркинг најмногу служи оградата, која е буквално под опсада вечерта кога се прикажува филм.
Некои се снаоѓаат врзувајќи ги велосипедите на дрвјата во дворот пред Куршумли-ан.
Дефинитивно градските и општинските власти треба да се посветат на решавање на овој проблем. Доколку секојдневно се промовира користење на велосипеди, треба да се вложи и во паркинзи за нив на локации кои што се посетени од луѓе што се одлучуваат да не ја загадуваат околината со издувни гасови.
На овој начин само се демотивираат велосипедистите. Зошто да продолжат да користат велосипед како средство за движење низ градот ако нема каде нормално да се паркираат?