Тренерот на Челси бара алиби по елиминацијата од Манчестер Јунајтед велејќи дека синоќа играле само бидејќи морале.
Синоќа Челси на „Стемфорд Бриџ“ доживеа елиминација од Манчестер Јунајтед губејќи со 1:2. За разлика од гостите, домашниот тренер Френк Лампард се одлучи да настапи со комбиниран состав давајќи им шанса на млади играчи и резервисти во комбинација со неколку првотимци.
Тоа го направи свесно, со цел да го одмори тимот за предизвиците во Премиер лигата и Лигата на шампиони кои му се приоритет.
„Имавме 7 победи во серија. Имавме два гостински натпревара во Лигата на шампионите каде сакаме да поминеме во наредната фаза. Морав да го погледнам тимот и да видам кој заслужува да добие минутажа. Тоа беа младите играчи. Ова натпреварување за нас е од таков карактер“, рече Лампард.
„Видов многу работи кои се добри за нашата иднина. Многу позитивности“.
„Мразам да губам, сите мразиме. Но, треба да се гледаат приоритетите, а нам ни следуваат многу важни натпревари на згуснатиот календар и затоа се фокусираме на нив“, заврши Лампард.