Пријателските натпревари најчесто се користат за темпирање на формата и подигање на атмосферата во репрезентацијата, но изгледа дека Србинот Милан Павков го сфати натпреварот против Германија премногу сериозно, па со многу остар старт ја загрози сезоната на Лирој Сане.
Павков доби директен црвен картон во продолжението од пријателскиот натпревар помеѓу Србија и Германија, откако претерано остро стартуваше на ногата на крилниот напаѓач на Манчестер Сити, Лирој Сане.
„Многу, многу злобен фаул. Сане имаше среќа што не се повреди. Такви стартови можат да ја скршат ногата на противникот, за среќа не се случи ништо сериозно“, изјави селекторот Јоаким Лев по натпреварот.
Селекторот на Србија, Младен Крстајиќ, веднаш по натпреварот реши да ја појасни ситуацијата и притоа му се извини на Јоаким Лев поради незгодната позиција во која беше ставен тој и неговите избраници.
„Беше фер натпревар, но црвениот картон беше лош. Разберете го играчот, ова му беше прв настап за националниот тим, немаше лоша намера“, изјави Крстајиќ.
Германија и Србија одиграа натпревар кој заврши со нерешениот резултат 1:1, во последниот натпревар за двете репрезентации пред почетокот на квалификациите за Европското првенство 2020 година.