Премиерот на Либан, Хасан Диаб вчера најави дека ќе предложи одржување предвремени избори во земјата, откако експлозијата во центарот на Бејрут во вторникот ја продлабочи кризата.
Во телевизиско обраќање, Диаб ги повика сите политички партии да ги остават несогласувањата настрана и да работат заедно. Тој додаде дека е подготвен да остане на функцијата наредните два месеца, за да им даде време на политичарите да спроведат структурни реформи.
Полицијата во Бејрут вчера употреби солзавец за да ги растера демонстрантите во главниот град на Либан. Демонстрантите се обидоа да се пробијат низ ограда за да стигнат до зградата на Парламентот во Бејрут за време на протестите разгорени од незадоволството на граѓаните од начинот на кој власта изреагира на смртноносната експлозија што го потресе градот во вторникот.
Бројот на загинати во експлозијата во центарот на Бејрут што се случи во вторникот денеска се искачи на 158, а повредени се повеќе од 6.000 лица, соопшти либанското Министерство за здравство.
Како што се наведува, 21 лице се водат како исчезнати.
Експлозијата во пристаништето во Бејрут ја предизвика палење на повеќе од 2.700 тони амониум нитрат, кој бил складиран шест години, откако бил конфискуван од царинската служба.