Утре четирите политички партии, потписници на договорот од Пржино треба да одржат лидерска средба, на којашто треба да одлучат дали се исполнети условите за тоа предвремените парламентарни избори да се одржат на 11 декември.
Ад-хок телото коешто треба да ги мониторира медиумите пред изборите сè уште не е комплетирано, но сè поизвесно е дека петти член на ова тело ќе биде Сефер Тахири, откако другиот кандидат Даут Даути ја повлече својата кандидатура со образложение дека не сака да биде пречка за формирањето на ова тело и закажувањето на изборите.
Четворицата членови на телото за медиумите делегирани од ВМРО-ДПМНЕ и СДСМ, повеќе од една седмица не можат да го изберат петтиот член на ова тело, кој треба да биде Албанец.
Со откажувањето на Даути, се очекува новинарите Цветин Чилиманов и Слаѓана Димишкова, предложени од ВМРО-ДПМНЕ и Горан Трпеновски и Љубомир Костовски, предложени од СДСМ, да постигнат консензус пред лидерската средба и да го изберат Сефер Тахири за член на ова тело и со тоа да биде задоволен еден од условите за одржување на изборите.
„Го поздравуваме повлекувањето на Даут Даути од кандидатурата за петти член на Ад хок телото за мониторинг на медиуми за време на избори. Со тоа, веќе не постои натамошна пречка, четворицата избрани членови да го изберат единствениот преостанат кандидат и да го комплетираат составот на телото. Ги повикуваме да го направат тоа што поскоро, за да може Ад хок телото да почне со својата законски предвидена работа“, велат од СДСМ.
Сè уште не е кандидиран ниту уредник на јавниот сервис МРТВ, а според неофицијалните информации коишто ги објавија медиумите, СДСМ ќе ја кандидира новинарката Санта Аргирова за нов уредник на МРТВ.
Неофицијално средбата е закажана за во 13 часот, но партиите сè уште се договараат. И од СДСМ и од ВМРО-ДПМНЕ претходно изјавија дека има услови да се одржат избори на 11 декември и дека ќе се одржи лидерската средба.
На 19 август итече и рокот за пријавување на спорните гласачи во Државната изборна комиисја, па над 30.000 граѓани ќе имаат дополнителна можност да се пријават до ДИК во тек на јавниот увид пред предвремените избори за избор на пратеници во Собранието на Република Македонија.
