Германија е шокирана од неодамнешниот бран физички напади врз политичари, што доведе до протести на илјадници луѓе во Берлин и Дрезден.
Последната капка се случи во петокот, на 3 мај, откако четворица насилници поврзани со екстремната десница претепаа социјалдемократски политичар кој се кандидираше за изборите за Европскиот парламент.
Освен што овие инциденти мотивираа илјадници граѓани да излезат на улица, договорено е министрите за внатрешни работи на 16 провинции денеска да одржат вонреден состанок на оваа тема.
Во петокот, група од четворица млади момчиња во Дрезден го претепаа Матијас Еке, 41-годишен член на Социјалдемократската партија (SPD), која го формира столбот на владата на национално ниво. Еке беше претепан додека лепеше плакати пред европските избори на 9 јуни, на кои тој беше кандидат. Извори од SPD за германските медиуми изјавија дека тој ќе мора да оди на операција. Само неколку минути пред да биде претепан, истата група нападна 28-годишен член на Партијата на зелените, кој исто така лепеше плакати. Оваа насилна кампања ја потресе државата.
Сите четворица тинејџери се под истрага, сите се германски државјани на возраст од 17 и 18 години. Најпрво во неделата еден од нив, 17-годишно момче, се предал на полицијата, по што полицијата ги идентификувала другите тројца и извршила претрес во нивните домови. Не се знае дали се уапсени и кои биле нивните мотиви, но очевидци на настанот тврдат дека младите биле облечени во црна облека и дека изгледале како членови на десничарски групи.
Министерот за внатрешни работи на покраината Саксонија, во која се наоѓа Дрезден, рече дека само во таа покраина од почетокот на оваа година се регистрирани дури 112 политички мотивирани напади, од кои 30 напади врз функционери и политичари. .
Германија веќе неколку години се бори со проблемот со насилството врз политичарите, а клучниот момент што ја одреди таа борба беше убиството на конзервативниот политичар Валтер Либке. Тој беше убиен во 2019 година од неонацист кој доби доживотна казна затвор две години подоцна, а обвинителите го нарекоа прво политичко убиство на десничарски екстремист од крајот на Втората светска војна. Либке бил познат по неговите позитивни ставови за миграцијата, што го налутило неговиот убиец.
