Чудо се појави во Тафталиџе! Велосипедска лента на ул. „Лондонска“! Вака соопшти денеска здружението НаТочак. Но, велолентата веднаш ја узурпираа неодговорни возачи.
Новата лента за велосипеди е од едната страна на улицата „Лондонска“ во Тафталиџе. Почнува од бул. „Митрополи Теодосиј Гологанов“ кај „Олимпико“, минува покрај училиштето „Јахја Кемал и завршува на бул. „Партизански одреди“.
„Оваа улица е една од најживите во цел Карпош. По неа се движат ученици од околните основни и средни училишта, луѓе кои пазарат на зелениот пазар во Тафталиџе или трите околни трговски центри (Олимпико, Тафталиџе и најважно - Сити мол), студентите кои живеат во студентскиот дом 'Гоце Делчев' и илјадниците жители во околните згради и куќи“, велат од НаТочак.
На оваа улица очајно ѝ е потребна безбедна инфраструктура за пешаци и велосипеди, напоменува здружението. Додавата дека велолентата треба што поскоро да продолжи до „Илинденска“.
„Таа е конектор меѓу два главни булевари, меѓу кои на едниот е велосипедската лента по која се движи најголемиот број на жители од овој регион (без бројачи не би можеле да знаеме, но ова е лична перцепција која може лесно да се потврди ако се гледа колку жители чекаат семафор на своите велосипеди на раскрсницата на 'Партизанска' со 'Московска', кај Сити мол). Оваа велосипедска лента треба природно да продолжи кон 'Илинденска' преку ул. 'Манапо', која е со предимензионирани коловозни ленти, најчесто нема паркирани возила или многу малку станбени/комерцијални објекти на кои би им требал приод и очекуваме лентите и таму набрзо да бидат изведени“.
Од сликата што ја објкави НаТочак може да се види дека столпчињата се ставени на преголема дистанца, доволно да пројде и да се паркира цел камион, а камо ли автомобил.
„Очекуваме нивната густина да се зголеми, исто како на бул. 'Митрополит Теодосиј Гологанов' кај АМСМ/Млин Балкан/студентски дом 'Кузман'. Очекуваме ваква лента да биде изведена и од западната страна на оваа улица како би се извело непрекинато движење на велосипедистите во двете насоки“, сметаат од НаТочак.
Инаку, велолента на ул. „Лондонска“ е ветувана од 2014 година. Половично реализирана дури во 2023.
