Играчот од средниот ред на Атлетико и шпанската репрезентација, Маркос Љоренте (29), се храни како пештерски човек. Станува збор за палеолитската исхрана, која подразбира консумирање на храна која ја земале луѓето од времето на старото камено време. Поточно, Љоренте јаде месо, овошје, зеленчук, риба, јајца, јаткасти плодови и слично.
Од друга страна, на пример, не јаде ориз, тестенини, леб, брашно, млечни производи, преработени месни производи и рафинирани јаглехидрати.
„Го јадам она што се јадело во палеолитот. Морав да ја елиминирам рафинираната храна, не смеам ни да ја гледам, ниту житариците. Оваа диета е начин на живот. Вака живеам, вака ќе умрам. Тоа е за моето здравје, не само за фудбалот. Ќе продолжам да се грижам за себе и кога ќе ја завршам кариерата“, изјави Љоренте за Cadena SER.
Популарно наречена едноставно палео, поборниците на оваа диета тврдат дека човековото тело е најдобро приспособено на исхраната која со векови ја консумирале нашите предци од каменото време.
Љоренте ги помина сите возрасни категории на Реал Мадрид, играше и за првиот тим. Во Алавес беше кратко време, додека Атлетико го доведе во 2019 година за 30 милиони евра.
Во Атлетико одигра 194 натпревари, постигна 27 гола и забележа 28 асистенции. За шпанската репрезентација има 18 настапи, а Transfermarkt неговата вредност ја проценува на 30 милиони евра.