Сите знаеме како функционира Netflix - платформата овозможува повеќе претплатници да гледаат содржини истовремено, опција наменета за луѓе во исти домаќинства.
Сепак, злоупотребата на оваа опција е толку голема што компанијата сериозно размислува да се спречи споделувањето лозинки.
Секако, во Netflix се свесни дека којзнае колку луѓе често споделуваат една лозинка, со цел да ги намалат трошоците и да ја поделат сумата за претплатата. Пред пет години, еден од основачите, Рид Хејстингс, изјави дека ова споделување на лозинки е „нешто со кое ќе мораат да живеат“, бидејќи е невозможно да се знае кој ја споделува лозинката со членови на семејството дома, а кој со пријателите.
Аналитичката компанија Magid спроведе истражување во кое заклучи дека околу една третина од корисниците на Netflix ги споделуваат своите лозинки со други луѓе.
Во последно време, се чини дека раководителите на Netflix одлучија дека не сакаат да „живеат со тоа“ доколку не мораат, бидејќи на некои корисници неодамна им беше кажано дека „ако не живеат во исто домаќинство со сопственикот на профилот , треба да имаат свој профил за да ги гледаат содржините“.
На некои регистрирани корисници им беше испратена и СМС-порака со код што треба да го внесат доколку сакаат да продолжат да ја гледаат содржината.
BBC контактираше со Netflix, од каде им беше кажано дека спроведуваат тестови за да проверат дали профилите се користат регуларно. Сепак, сè уште нема информации дали оваа проверка ќе биде продолжена и проширена, дали оние што не живеат во исто домаќинство со сопствениците на профилите ќе сносат некои последици, како и какви можат да бидат тие последици.