Фудбалската федерација на Македонија и Фудбалската асоцијација на Ерменија го потврдија контролниот натпревар меѓу нивните две репрезентации.
Контролната пресметка меѓу двете селекции е закажана за 17 октомври (вторник) на стадионот „Благој Истатов“ во Струмица со почеток во 15:00 часот.
За овој натпревар се зборуваше дека ќе се игра уште преед некој емсец, но дури сега е потврден. Македонија претходно, на 14 октомври игра на гости против Украина во ЕУРО 2024 квалификациите, додека Ерменија на 12-ти игра против Латвија на гости. Двете репрезентации се слободни во вториот октомвриски термин, па затоа договорија пријателска.
Добро е што ФФМ одлучи натпреварот да го организира во град различен од Скопје. Но, терминот во вторник среде работно време не е добар избор.
Последниот натпревар против Ерменија го одигравме на 11 ноември 2021 година во квалификаците за Мундијалот 2022. Тогаш во Ереван избраниците на селекторот Благоја Милевски славеа со убедливи 5:0.
Ерменија е репрезентација против која Македонија има одиграно убедливо најмногу натпревари во својата историја - 12, а овој ќе биде 13-ти. Во меѓусебниот скор Македонија има 5 победи, Ерменија има 4, а 3 натпревари завршија без победник. Гол-разликата е 20:17 во корист на Македонија.
Репрезентацијата на Македонија само со три репрезентации има одиграно двоцифрен број на натпревари. Најмногу се оние 12 со Ерменија, со Лихтенштајн имаме 11, а со Албанија 10.