Цирих, 24 октомври 2019 (МИА) – Македонската фудбалска репрезентација бележи скок од едно место на ФИФА ранг-листата објавена денеска и сега се наоѓа на 68-то место.
Прогресот на Македонија се должи на победата над Словенија во октомврискиот прозорец од квалификациите за ЕУРО 2020.
Од противниците на Македонија во квалификациите за ЕП, на октомвриското рангирање на ФИФА, најдобро котира Полска на 21-вото место, Австрија е 25-та, Словенија се наоѓа на 65-тата позиција, Израел е 89-ти, додека Латвија е 143-та.
Противникот на Македонија во плеј-офот од Лигата на нации, репрезентацијата на Косово е на 114-тото место.
На врвот и натаму е Белгија пред Франција и Бразил. Во Топ 10 се репрезентациите на Англија, Уругвај, Португалија, Хрватска, Шпанија Аргентина и Колумбија.
Следното рангирање ФИФА ќе го изврши на 28 ноември.
