Францускиот претседател Емануел Макрон денеска изјави дека реставрацијата на црквата Нотр Дам во Париз, која беше уништена од пожар во 2019 година, ќе биде завршена во предвидениот рок.
„Откако ќе се утврдат насоката и планот, можен е напредок“, рече Емануел Макрон за време на обиколката на градежните работи на катедралата.
Официјалното отворање за одржување на света миса и посети е планирано за крајот на 2024 година.
„Мислам дека денес можам да ви кажам дека ќе успееме“, рече генералот Жан-Луј Жоржелин, задолжен за реконструкцијата.
„Не беше лесно, но ги надминавме сите пречки“, додаде тој, информирајќи го претседателот за напредокот на работите.
Макрон, во кацига и работничко одело, придружуван од сопругата Брижит и министерката за култура Рима Абдул-Малак, ги поздрави работниците и раководителите на градилиштето, и им рече дека можат да се гордеат со сработеното.
Потоа се качи да види како изгледа столбната плоча на која кон крајот на месецот ќе почне да се поставува новата централна кула.
Поставувањето на столбната плоча од 80 тони ќе се заврши в сабота, точно четири години по пожарот. Катедралата потоа ќе ја врати својата кула висока 96 метри, која ќе биде идентична со старата - направена од даб, камен и олово - изградена од архитектот Виолет-Ле-Дук од 19 век.