Францускиот претседател, Емануел Макрон, изјави дека го убедил американскиот претседател Доналд Трамп да не ја повлекува војската од Сирија и долгорочно да се ангажира во таа земја.
Трамп пред две недели најави дека САД „многу бргу ќе се повлече од Сирија“.
Макрон поради тоа изјави дека воедно наговорил Трамп и да ги прекине воздушните напади во Сирија.
Силите на САД, Британија и Франција во саботата извршија ракетни напади во Сирија, како одговор на наводниот хемиски напад во градот Дума.
Двајцата претседатели, за кои се тврди дека се во срдечни односи, изминативе неколку дена често разговарале преку телефон.
Откако Макрон во тричасовно телевизиско интервју ги изнесе овие тврдења, портпаролката на Белата куќа Сара Сандерс изјави дека „ништо не е променето“.
„Претседателот јасно истакна дека сака американските трупи што побргу да се вратат назад“, изјави таа, но додаде и дека САД се „одлучни потполно да ја скршат Исламската држава“.
Макрон во текот на интервјуто инсистираше дека западните сојузници „имале полн легитимитет да дејствуваат“ во Сирија, како и тоа дека постојат цврсти докази за хемискиот напад на 7 април во Дума и дека за тоа е одговорна сириската влада на чело со претседателот Башар Ел-Асад.
Сириските власти во повеќе наврати демантираа дека користеле хемиско оружје.
Макрон изјави дека директно му се обратил на рускиот претседател Владимир Путин, на кого му рекол дека Русија, која воено и дипломатски го поддржува Асад, на еден начин е исто така одговорна за нападот.
„Тие сами не фрлаа хлор, но методично користеа дипломатски канали за да спречат настани кои би ги осудиле за хемиски напад“, изјави францускиот претседател.
Макрон изјави дека сака дијалог со сите страни вклучувајќи ја и Русија, за да се пронајде политичко решение околу завршување на конфликтите во Сирија, а истакна и дека во мај ќе отиде на од порано планираниот пат во Москва.
