Хрватскиот фудбалер Марио Манџукиќ денеска објави крај на кариерата, по 17 години одлучувајќи да стави крај на исклучително успешната фудбалска кариера во која успеа да стане светски вицешампион.
Еден од најголемите хрватски играчи на сите времиња се збогуваше со емотивно писмо што го пренесуваме од почеток до крај. Во него тој како од иднината да се обраќа на самиот себе кога бил дете.
„Драг малечок Марио,
додека ги облекуваш овие копачки, твои први во животот, не можеш ни да замислиш што ќе постигнеш во фудбалот. Ќе постигнуваш голови на најголемите стадиони и ќе ги освојуваш најголемите трофеи во дресовите на најголемите клубови. Во дресот на најголемата гордост, хрватската репрезентација, ќе испишеш некои од најважните моменти на хрватскиот спорт.
Ќе успееш бидејќи ќе имаш многу луѓе на патот кои ќе ти помогнат - соиграчи со кои ќе се бориш, тренери од кои ќе учиш, навивачи кои ќе те поддржуваат тебе, потоа семејството, менаџерите и пријателите кои секогаш ќе бидат со тебе. На сите нив засекогаш ќе им бидеш благодарен!
И пред сѐ, ќе успееш бидејќи секогаш ќе го даваш најдоброто од себе, и на крајот од кариерата, најмногу ќе бидеш горд на тоа. Ќе жртвуваш многу за фудбалот, но ќе знаеш дека вредело поради неверојатните моменти што си ги доживеал.
Ќе го препознаеш вистинскиот момент за завршување на играчката кариера, ќе ги ставиш овие копачки во витрина и ќе бидеш среќен што не жалиш за ништо. Фудбалот секогаш ќе биде дел од твојот живот, но ќе му се радуваш на новото поглавје.
Уживај!
Твојот голем Марио.
П.С. Ако некогаш играш против Англија во полуфиналето на Светското првенство, бидеш сконцентриран таму околу 109. минута“, напиша Манџукиќ.
Марио Манџукиќ ја започна својата фудбалска кариера во 2004 година играјќи за Марсонија. Една година подоцна се префрли во Загреб, а од 2007 во Динамо, за кој играше до 2010 година.
Со одлични игри во дресот на „Модрите“ си обезбеди трансфер во Волфсбург, од кој се пресели во Баерн во 2012 година. Потоа играше за Атлетико Мадрид, Јувентус, Ал-Духаил и конечно за Милан.
Дебитираше за хрватската репрезентација во 2007 година и одигра вкупно 89 натпревари на кои постигна 33 гола. Во полуфиналето од Мундијалот 2018 против Англија го постигна режавачкиот гол во 109. минута праќајќи ја Хрватска во историско финале.