Илон Маск верува дека ограничувањето на SpaceX на употребата на сателитскиот интернет сервис Starlink од страна на украинската војска за контрола на беспилотни летала е неопходно за да се спречи конфликтот да ескалира во светска војна.
„Starlink е комуникациски столб на Украина, особено на првите борбени линии, каде што е уништена речиси целата друга интернет конекција. Но, нема да дозволиме ескалација на конфликтот што може да доведе до Трета светска војна“, напиша Маск на Twitter како одговор на барањето на поранешниот астронаут на НАСА, Скот Кели, за враќање на целосниот пристап до интернет за украинските сили.
Американската вселенска компанија основана од Маск, ја користи својата услуга Starlink за на Украина да ѝ обезбеди пристап на интернет од почетокот на конфликтот, бидејќи инфраструктурата на оваа земја е тешко оштетена од руските напади.
Минатата недела, извршната директорка на SpaceX, Гвин Шотвел, рече дека услугата што ја користат украинските сили за контрола на беспилотни летала „никогаш не требаше да биде вооружена“, додавајќи дека компанијата презела чекори за ограничување на неговата употреба, без да прецизира какви мерки се преземени.
Оваа вест предизвика бурни реакции во Украина, а советникот на украинскиот претседател, Михајло Подољак, напиша дека компаниите мора да одлучат дали се „на страната на Украина и правото на слобода“ или „на страната на (Русија) и нејзиното 'право' да убива и да ограбува територија“.