Милијардерот Илон Маск смета дека напнатоста меѓу Кина и Тајван може да се реши така што дел од контролата над Тајван се предаде на Пекинг.
Пред неколку дена тој зборуваше за можен договор меѓу Русија и Украина за завршување на војната, а многу Украинци го осудија неговиот гест.
„Моја препорака би било да се измисли посебна административна зона за Тајван која е разумно прифатлива, но веројатно нема сите да ги усреќи“, изјави најбогатиот човек во светот во интервју за Financial Times.
Маск одговори на прашање за Кина, каде неговата компанија Tesla управува со фабрика во Шангај.
Пекинг, кој тврди дека демократски Тајван е една од кинеските провинции, одамна се обврза да го доведе Тајван под своја контрола и не ја исклучи можноста за употреба на сила за да ја постигне целта. Тајванската влада строго се противи кон кинеските аспирации и вели дека само жителите на Тајван, станува збор за 23 милиони граѓани, можат да одлучат иднината.
„Можно е, а мислам и веројатно, всушност да може да се постигне договор поблаг отколку со Хонгконг“, изјави Маск.
Кина на Тајван му понуди систем „една земја, два системи“, модел на автономија сличен на оној во Хонгконг, но повеќето политички партии во Тајван го отфрлија, особено нема јавна поддршка откако Пекинг воведе строг закон за националната безбедност во Хонгконг во 2020 година.
