Илон Маск рече дека Twitter ќе наплатува по 8 долари месечно за корисниците на Twitter кои сакаат да имаат сина птица до нивното име, што всушност означува дека се работи за потврден профил.
Сината птица до корисничкото име - обично за личности од висок профил - моментално е бесплатна. Критичарите сметаат дека воведувањето на надокнада би можело да ја отежни идентификацијата на веродостојните извори.
Маск, најбогатиот човек на светот, истакна дека претплатените корисници ќе имаат приоритет во одговорите и пребарувањата, а двојно помалку реклами. Не прецизираше кога ќе започне наплатата.
„Моќ на народот! Сино за 8 долари месечно“, напиша милијардерот на Twitter, критикувајќи го стариот метод на проверка на сините птици како „систем на господари и селани“.
Некогашниот Twitter метод за верификација на корисниците за сина птица вклучуваше кратка онлајн пријавница и беше резервиран за оние чиј идентитет бил мета на лажно преставување, како што се познатите личности, политичарите и новинарите. Компанијата тоа го воведе во 2009 година откако се соочи со тужба во која беше обвинета дека не прави доволно за да ги спречи лажните профили.
Но, сега Маск се соочува со тежок предизвик додека работи на ревизија на работењето на Twitter, кој со години не остваруваше профит. Рече дека сака да ја намали зависноста на Twitter од реклами, иако некои компании се загрижени за рекламирањето на оваа социјална мрежа под водство на Маск.
Воведувањето на оваа наплата предизвика лавина реакции од оние кои веќе имаат птица на сина позадина до нивното корисничко име, но тоа воопшто не го загрижи Маск кој им порача дека кукањеро им е бадијала.
„До сите што се жалат, слободно продолжете со кукање, сепак ќе чини 8 долари“, твитна тој ноќеска.