Килјан Мбапе синоќа испиша историја за Пари Сен-Жермен и на само 24 години стана најдобар стрелец на клубот.
Во синоќешната победа од 4:2 над Нант, Мбапе го постигна својот 201 гол во дресот на Пари Сен-Жермен и со тоа стана најдобриот стрелец во историјата на парискиот клуб.
Од првото место го тргна Единсон Кавани кој на 301 настап постигна точно 200 гола. За споредба, на Мбапе му беа потребни само 247 натпревари за да го достигне рекордот.
Во чест на Мбапе по натпреварот се одржа свечена церемонија на која му беше врачен пехарот со бројот 201.
„Играм за да пишувам историја. Секогаш велев дека сакам да пишувам историја во Франција, во мојот главен град. Тоа е она што го правам, чувството е прекрасно, но имам уште долг пат да одам. Тоа е личен успех, но дојдов и за колективен успех“, изјави Мбапе, кој со тоа уште еднаш истакна дека приоритет му е освојувањето на Лигата на шампионите со ПСЖ.
Треба да се има предвид дека, за разлика од другите европски великани, ПСЖ е прилично млад клуб со не така долга историја. Формиран е во 1970 година.