Европската Унија мора да се потруди повеќе за да ги заштити своите граници и да го запре заминувањето на бродови со мигранти од Северна Африка, изјави денеска италијанскатаа премиерка Џорџа Мелони.
Мелони ова го изјави во италијанскиот парламент пред самитот на европските лидери оваа недела.
Италија, која вети цврст став за имиграцијата, во неделата пречека повеќе од 500 мигранти кога дозволи два брода со хуманитарна помош да се закотват. Подоцна во дебатата, Мелони рече дека политиката на ЕУ за релокација на мигрантите не функционира за Италија, која носи преголем товар.
„Не мислам дека решението е во тоа што Италија е единственото пристаниште за влез во ЕУ, а потоа другите земји земаат 30 луѓе на 100.000“, рече Мелони.
„Не мислам дека Италија треба сама да го прави она што другите не се подготвени да го направат“, додаде таа. Сепак, и другите земји од ЕУ се под притисок на други рути на мигранти. Само во септември Франција примила околу 15.000 барања за азил, Германија речиси 21.000, Австрија околу 15.700 и Шпанија повеќе од 11.000 во споредба со 8.500 за Италија, покажуваат податоците на европската статистичка агенција Еуростат.
Тензиите меѓу Рим и Париз се разгореа минатиот месец откако Франција дозволи чамец со околу 230 мигранти да се симне откако Италија го спречи неговото симнување. Повеќе од 98.000 мигранти пристигнале во Италија по море оваа година, во споредба со околу 63.000 во истиот период во 2021 година, според податоците на Министерството за внатрешни работи.
