Култната автомобилска емисија Top Gear постојано се соочува со проблеми по ангажирањето на новата екипа предводена од Крис Еванс, која требаше да ја продолжи работата на Џереми Кларксон, Џејмс Меј и Ричард Хамонд.
По проблемите со огромниот пад на гледаноста, сега британскиот таблоид Sun тврди дека Мет Лебланк може да го напушти шоуто ако Крис Еванс остане водител.
Актерот кој се прослави со улогата на Џои во серијата Friends беше изненадувачки избор на продуцентите, но во првите епизоди се покажа како одличен избор. Сепак, јасно е дека меѓу водителите нема доволно силна хемија за да го повторат она што го правеа претходните водители.
Последната епизода имаше најлош рејтинг во историјата на емисијата, а бројот на гледачи беше преполовен од премиерата до денеска - од 4,3 милиони на 2,34 милиони.
Според таблоидот втората сезона ќе биде неизвесна се додека не се решат проблемите со екипата, а Лебланк не е единствениот на кој му смета однесувањето и ароганцијата на Еванс.
