На денешната теренска активност во Општина Лозово, во рамките на кампањата „Важно е! Од тебе зависат промените!“, претседателот на ВМРО-ДПМНЕ, Христијан Мицкоски, одговарајќи на новинарско прашање, истакна дека случајот на Онкологија е еден грозоморен настан, кој е коментиран веќе подолго време, а работата на собраниската комисија на површина има изнесено катаклизмички и шокантни информации.
„Морам да кажам дека преку свиркачи добиваме многу сведоштва, документи и таков еден случај документиран прилично темелно и јасно добивме пред неколку дена и го истражуваме и анализираме, кој се однесува за сега, а не за минатото. Бидејќи анкетната комисија го опфаќа периодот до 2020 година, јас зборувам за сега, за 2023 година“, рече Мицкоски.
Првиот човек на ВМРО-ДПМНЕ додаде дека сè уште информациите од свиркачот се проверуваат и доколку се потврдат, лично тој ќе излезе во јавност со тие информации.
„Ако тоа се потврди како точно, тогаш навистина можам да кажам дека имаме работа со монструми, а не со луѓе, кои, и покрај ова што се случува и покрај епскиот скандал, тие повторно продолжуваат со злоупотреби, кои имаат нечовечки размери и ние планираме со ова да излеземе во јавност доколку ова што го достави свиркачот се потврди како точно и имаме намера на Обвинителството да му отвориме сериозна работа бидејќи гледаме дека истрагата во МВР се калкулира, се препелкаат, тогаш ние имаме намера да ја преземеме работата во свои раце и да одиме до крај“, заклучи Мицкоски.
