Иако публиката ја знае првенствено од хумористични ТВ-серии и романтични комедии, на актерката Мили Кунис не ѝ се туѓи ни „помрачните“ улоги.
Па така, во нејзиниот најнов филм, драмата „Four good days“, Кунис ја толкува улогата на зависничка од хероин, Моли, која мора да помине низ процес на рехабилитација за да го добие потребниот лек.
Улогата на мајка ѝ ја игра легендарната Глен Клоуз, која неодамна беше номинирана и за Оскар, и за Златна малина за нејзината улога во филмот „Hillbilly Elegy“.
Драмата „Four good days“ го следи тешкиот пат на зависниците од хероин до закрепнување, како и неопходноста од семејна поддршка. Според објавениот трејлер, мајката Деб е фрустрирана што нејзината ќерка е зависничка и начинот на комуникација со неа е груб, што добро ја отсликува немоќта и на лицето кое страда од оваа болест и на најблиските членови на семејството.
Филмот „Four good days“ се базира на вистинската приказна за Илајџа Саслоу, добитник на Пулицерова награда, кој исто така е еден од сценаристите на филмот.
Филмот ќе се појави во кината на 30 април.