Италијанскиот гигант Милан дефинитивно го напушта „Џузепе Меаца“, викан и „Сан Сиро“, и ќе гради свој нов стадион, пишува денеска La Gazzetta dello Sport.
Иако Милан и Интер со години работеа на проек за изградба на нов заеднички стадион и во декември минатата година добија дозвола од градските власти, „Росонерите“ сега се повлекоа.
„Големата романса помеѓу Милан и 'Сан Сиро' заврши. Ќе останат прекрасни спомени, но Милан се движи во друга насока без Интер. Клубот успеа да се врати на врвот на италијанскиот фудбал со освојувањето на титулата минатата година, а сега и сопствениците сакаат да го вратат на врвот на Европа. За таа цел потребен е нов стадион и на кој ќе игра само Милан, кој има структурирана сопственичка структура и иднина, додека таа кај Интер е многу дискутабилна. Милан сака да има свој стадион кој ќе му носи приход во текот на целата година, што е клучно за финансиската стабилност“, пишува Gazzetta.
Во текстот се наведува дека Милан сигурно нема да го гради стадионот во населбата „Сан Сиро“ и дека се размислува за други три локации во градот.
Да потсетиме дека Милан на „Џузепе Меаца“ се пресели во далечната 1926 година кога стадионот имаше капацитет од само 30.000 гледачи.
И Милан и Интер годишно плаќаат сума од околу 8,5 милиони евра за изнајмување на стадионот.
Бидејќи се наоѓа во миланската населба Сан Сиро, стадионот „Џузепе Меаца“ нагалено го викаат токмиу според името на населбата. Инаку, именуван е по легендарниот напаѓач Џузепе Меаца, кој ја предводеше Италија до две титули на Мундијалите во 1934 и 1938, а има настапувано и за Интер и за Милан, иако далеку повеќе за „Нераѕурите“.
