Тимот на Милан го победи Наполи во дерби натпреварот од 28. коло на италијанската Серија А со минимални, но доволни 1:0, а херој на „Росонерите“, кои сега се први на табелата, беше францускиот напаѓач Оливје Жиру.
Во првите 45 минути гледавме многу лош фудбал од двете страни, немаше многу шанси вредни за споменување, иако домашната екипа имаше нешто поголем посед на топка и повеќе удари кон голот.
Сепак, на стартот од вториот дел Милан поведе. Давиде Калабрија шутираше, топката одеше вон голот, но на вистинското место беше Жиру кој ја сврте топката во мрежата и на тој начин го доведе својот тим во водство. Тоа беше негов 8 гол сезонава.
Десетина минути по голот на гостите од Милано домашниот стратег Лучано Спалети направи двојна замена при која во игра влезе и нашиот Елиф Елмас, кој сепак не успеа да му помогне на Наполи да избегне непланиран пораз на домашен терен.
Милан потоа ја задржа предноста и успеа да се одбрани до крајот и да освои 3 бода, а победата во ова дерби на крајот може да биде клучна во борбата за Скудетото.
Милан по синоќешниот натпревар е прв на табелата со 60 освоени бода, 2 повеќе од Интер кој има натпревар помалку (одложениот со Болоња), а сега има 3 бода повеќе од Наполи.