Лука Модриќ вели дека разговорите со Реал Мадрид за продолжување на договорот, што истекува на 30 јуни, „одат во вистинската насока“.
„Разговарам со клубот и сè оди во вистинска насока. Среќен сум како се одвиваат работите, но не можам да кажам повеќе", рече Модриќ (35) на прес-конференцијата во шпанскиот град Малага, каде вечерва Реал Мадрид и Атлетик Билбао ќе играат полуфинален натпревар од Суперкупот на Шпанија.
„Тука сме веќе три дена и се чувствуваме добро. Впечатокот е позитивен. Пред нас е важен натпревар, па затоа се подготвуваме многу добро за тоа“, изјави Модриќ. Откако го облече белиот дрес на „Кралскиот клуб“ во 2012 година, тој освои три Суперкупа на Шпанија. Тоа беше и негов прв трофеј по пристигнувањето од лондонски Тотенхем.
Модриќ во моментов е најстариот играч во Реал Мадрид, а тренерот Зинедин Зидан константно го има во почетниот состав од крајот на октомври. Во последно време не го штеди како на почетокот од сезоната.
„Тоа е одлука на тренерот. Нема потреба да барам други причини. Тука, кога на некого ќе му дојде редот да игра, дава сè од себе", изјави хрватскиот играч за врска зад кого се 23 натпревари сезонава. Постигна четири гола и асистираше еднаш.
„Не сменив ништо особено за да бидам во ваква форма. Имам многу силна желба да покажам дека годините не се проблем. Не треба да се гледа возраста, туку да се покаже својата вредност на теренот“, изјави „десетката“ на Реал Мадрид.
На 30 јуни истекуваат договорите на крилниот играч Лукас Васкес и на капитенот Серхио Рамос. Преговорите меѓу стоперот Рамос, кој во март ќе наполни 35 години и администрацијата, предводена од претседателот Флорентино Перес и извршниот директор Хосе Анхел Санчес, не напредуваа.
„Му посакувам сè најдобро за Серхио затоа што ми е пријател. Нема да застанам на едната или на другата страна. Тоа е прашање меѓу Серхио и клубот, исто како што мојот случај е прашање меѓу мене и клубот. Не можам да се ставам на ничија страна, ова се индивидуални ситуации за секој од нас“, истакна Модриќ.
Поради пандемијата, Суперкупот на Шпанија оваа сезона не се игра во Саудиска Арабија како минатата, туку на југот на Шпанија. Победникот од натпреварот помеѓу Реал Мадрид и Атлетик ќе игра во финалето против Барселона, која славеше против Реал Сосиедад вчеравечер на пенали.
