Италијанскиот клуб Монца, познат по тоа дека од пред две години негов сопственик е легендарниот Силвио Берлускони, вчера официјално беше промовиран во втората италијанска лига, Серија Би.
Поранешниот претседател на фудбалскиот клуб Милан и на италијанската Влада, веднаш најави дека тоа не е сѐ.
„Ќе изградиме тим што ќе дојде до врвот на Серија Би и ќе влезе во елитата. Никогаш немав дилеми. Со играчите и со тренерот го правам она што отсекогаш го правев во Милан. Разговарам со нив, ги охрабрувам, ги мотивирам... Секогаш сум ги одржувал добрите навики“, рече Берлускони во интервју за локалниот весник Il Cittadino di Monza e della Brianza.
Монца е основана во далечната 1912 година, но никогаш во својата историја не успеала да заигра во елитната Серија А.
Истоимената покраина во Ломбардија се наоѓа на нешто помалку од 10 километри од Аркоре, каде Берлускони живее веќе неколку години.