Иако неговиот Сан Антонио Спарс кубури со резултатите, што донекаде е и очекувано со оглед на силната конкуренција на Западот, Виктор Вембанјама полека почнува да ја оправдува еуфоријата која не стивнува од неговото доаѓање во НБА лигата.
Заедно со Чет Холмгрен, тој е прв кандидат за руки во сезоната, а за тоа дека младиот Французин е на добар пат до ова признание говори и неговата игра од синоќа, кога го имаше највпечатливиот настап против Торонто Репторс откако пристигна на најголемата кошаркарска сцена во светот.
Вембанјама со 71% шут од поле ги предводеше Спарс до убедлива победа (122:99), а за само 29 минути на теренот запиша трипл-дабл со 27 поени, 14 скока и дури 10 блокови. Дополнително, додаде и 5 асистенции, но посебно вниманието на себе привлече со бројот на „бананите“ што им ги подели на Репторс.
Така, Вембанјама стана само петтиот кошаркар во историјата со скор 25-10-5, приклучувајќи се на вечната листа на великани како Хаким Олаџувон, Карим Абдул-Џабар, Дејвид Робинсон и Ралф Семсон. Додека синоќа стана четвртиот играч во историјата на Спарс со најмалку 10 блокови на еден натпревар и прва „рака“ по Тим Данкан, кој забележа минимални 20 поени, заедно со 10 скока и 5 блокови на еден меч.
За споредба, само тројца руки од сезоната 1973/1974 имаа трипл-дабл учинок со блокови, а тоа се Дејвид Робинсон, Ралф Семсон и Марк Итон.