Трансферот на Мароканецот Хаким Зијеш од Челси во ПСЖ шокантно пропадна во последен момент од јануарскиот преоден рок, откако лондонските „Сини“ не ја испратија навреме потребната документација и не успеаја навреме да се договорат.
Како што се наведува, потпишаните договори и договорената соработка не се валидни бидејќи регистрацијата не била извршена навреме, поточно пред полноќ, а иако клубовите се обидувале да најдат решение, засега овој договор е вон сила.
Како што пренесуваат медиумите од Франција, ПСЖ наскоро ќе поднесе жалба за сѐ што се случи синоќа, но јасно е дека одговорноста останува кај нив бидејќи имаа 31 ден да го комплетираат овој трансфер.
Со сето ова, јасно е дека раководните лица и адвокатите на Челси беа фокусирани на она што се случуваше во Португалија, каде што „Сините“ го договорија најскапиот трансфер во историјата на Премиерлигата, доведувајќи го Енцо Фернандес од Бенфика за 120 милиони евра.
Со оглед на лобито на споменатите клубови, а особено на ПСЖ со својот богат катарски сопственик, не е исклучено по жалбата овој трансфер да биде одобрен и на крајот сѐ да се реализира и да се најде „причина“ поради која клубовите не задоцниле во трката со времето.
Зијеш многу сакаше да го напушти Челси и да ја продолжи кариерата во друг клуб, а неговата единствена надеж после се е дека може да засили некој клуб во Турција, со оглед на тоа што таму преодниот рок трае до 8 февруари.