Откако пред неколку дена воените сили на Нагорно-Карабах потпишаа примирје со Азербејџан, со што барем засега е запрена војната, официјалните лица започнаа преговори. Паралелно со овој процес, во Советот за безбедност на ОН се водеше бурна дискусија токму за состојбата на Кавказ.
Според последните официјални информации, азербејџанските власти и Ерменците од Карабах седнале на преговарачка маса во градот Јевлах.
По средбата, претставникот на Нагорно-Карабах, Давид Бабајан, изјави дека бројни проблеми сѐ уште остануваат нерешени.
„Мораме да разговараме за многу прашања и проблеми. Конечниот договор сѐ уште не е постигнат“, рече Бабаџан, кој е инаку претседател на самопрогласената Република Арцах, во чиј склоп се наоѓа Нагорно-Карабах.
Советникот на претседателот на Азербејџан, Елчин Амирбеков, истакна дека е тешко да се очекува решение, но дека средбата може позитивно да се одрази на мировниот процес што се одвива на линијата Баку-Ереван.
Паралелно со преговорите, на седницата на Советот за безбедност на Обединетите нации се разговараше и за Нагорно-Карабах, каде беше употребена многу поостра реторика од претходно.
Претставничката на Франција, Катрин Колона, изјави дека никој не може да верува дека нападот од Азербејџан не бил намерен.
"По неколку недели собирање војници и воена опрема, Азербејџан одлучи да започне голема воена операција. Копнените и воздушните средства беа користени во големи количини, што предизвика последици и за цивилното население", рече Колона.
Слични размислувања сподели и шефицата на германската дипломатија, Аналена Бербок.
„Азербејџан избра начин да ја промени ситуацијата на терен со воена сила. Силно го осудуваме нападот на Баку и го повикуваме Азербејџан трајно да ги прекине своите воени операции. Потребен ни е целосен прекин на насилството. Депортација и присилна емиграција на етничките Ерменци од Карабах е неприфатливо“, порача Бербок.
Претставникот на САД во ОН, Линда Томас-Гринфилд, изјави дека прекинот на огнот ќе биде позитивен чекор во решавањето на проблемот.
„Сепак, ситуацијата на теренот и понатаму е тешка. Ние сме длабоко загрижени поради извештаите за насилство врз цивили. Меѓународната мисија која ќе влее доверба кај народот на Нагорно-Карабах ќе биде важна“, рече американската функционерка.
Во меѓувреме, многу жители на Нагорно-Карабах ги напуштија своите домови и се упатија кон Ерменија, односно деловите каде што се наоѓа рускиот мировен контингент, кој ја контролира областа од мировниот договор во 2020 година.
