Извршниот директор на компанијата Better.com, Вишал Гарг, отпушти околу 900 работници во еден Zoom повик, пренесe CNN.
„Доколку сте во овој повик тогаш сте дел од несреќната група којашто е отпуштена“, соопшти директорот на хипотекарната компанија во текот на Zoom повик кој подоцна беше објавен на социјалните мрежи.
Јавноста го критикуваше неговиот потег, нарекувајќи го како „груб“ и „студен“ и „ужасен чин“, особено пред Божиќ.
„Последниот пат кога го направив ова, плачев. Би сакал да ви соопштам поинакви вести, сакам да сме успешни“, изјави директорот.
Гарг вели дека отказите се резултат на перформансот и продуктивноста на работниците, како и промените на пазарот. Подоцна е објавено дека ги обвинил работниците дека „крадат“ од своите колеги и клиенти така што се непродуктивни и работат само два часа дневно. Тој отпушти 15% од работната сила во неговата фирма. Гарг им кажа на отпуштените работници дека ќе бидат контактирани од службата за човечки ресурси.
Не ја спомена финансиската инјекција од 750 милиони долари што компанијата ја доби од јапонската групација Softbank минатата недела. Овој извршен директор и претходно беше вмешан во контроверзии што може да се види од мејлови објавени од Forbes.
„Вие сте премногу бавни. Вие сте група глупави делфини, така што престанете. Престанете! Престанете веднаш! Ме срамите“, стои во еден од мејловите.
Главниот финансиски директор Кевин Рајан изјави дека е тешко да се отпуштаат луѓе, особено во овој период од годината, но додаде дека намалувањето на работна сила е неопходно поради радикалните промени на пазарот.