Најновата повреда на колентото на Златан Ибрахимовиќ е уште еден знак дека веројатно најдобро за сите ќе биде доколку ги закачи копачките.
Веќе 40-годишниот Швеѓанец сезонава пропушти 16 натпревари поради повреди, страдајќи од проблеми со коленото и Ахиловата тетива, со што само малку придонесе во борбата на неговиот Милан за Скудетото.
Тековнава сезона Ибра одигра точно 937 минути во Серија А, што е навистна премалку. Постигна 8 гола, што кажува дека и на 40 години сѐ уште располага со квалитетот кој отсекогаш го имал. Нажалост, тоа е премалку за да се оправда новиот договор кој евентуално би го добил.
Милан полека созрева под водство на Стефано Пиоли. Неосвојувањето на титулата минатата сезона само го зголеми апетитот и зрелоста на тимот, што е евидентно со зголемениот квалитет на игра сезонава.
И покрај повредите, не може да се рече дека Ибрахимовиќ не одигра важна улога во процесот на созревање на Милан, со оглед на тоа што беше лидер на теренот и пример на докажан победник за младите соиграчи. Неговите голови исто така беа клучни, но сега друг ветеран покажа дека тој може да ги донесе истите успеси.
35-годишниот Оливје Жиру летоска дојде во Милан со договор вреден околу милион евра и стана нов клучен играч во тимот на Пиоли, давајќи им пример на младите Рафаел Леау и Алексис Салемакерс. Французинот постигна решавачки голови, како на пример оние два во градското дерби со Интер, или пак победничкиот против Наполи.
Доаѓањето на Жиру и неговиот импакт во тимот се знак дека Ибрахимовиќ повеќе не е потребен, ни како лидер ни како голгетер. Неговото заминување ќе го олесни и буџетот за плати на „Росонерите“, овозможувајќи им да донесат свежа крв на лето.
