Огромна огнена топка го осветли небото над Флорида во вторникот вечерта по локално време, а НАСА веднаш била „бомбардирана“ со повици од загрижени граѓани од реонот на Тампа кои не знаеле за што станува збор.
Аматерските снимки на граѓани кои случајно ја забележале чудната појава, ги преплавија социјалните мрежи. На снимките се гледа метеор што паѓа со огромна брзина и потоа експлодира во далечината.
Покрај Американската вселенска агенција, повици добило и Американското метеорско друштво, непрофитна организација што е задолжена за следење на вакви појави.
Иако глетката била спектакуларна за оние кои првпат гледаат ваква огнена топка, се работи за мал метеор што влегол во атмосферата на Земјата.
Притисокот што се формира пред него создава голема температура поради која ваквите вселенски објекти најчесто горат високо во атмосферата.
Ваквите феномени се прилично чести, во еден ден горат околу илјада вакви метеори во атмосферата на Земјата.
Поголемиот дел од нив не ги гледаме бидејќи се случуваат над океани, ненаселени подрачја или во текот на денот, кога сончевата светлина го блокира погледот.
Покрај тоа, повеќето и од оние што се случуваат навечер не ги гледаме бидејќи претежно сме во затворени простории, објави „Daily Mail“.