Холандија и Чешка се одлучија дека ќе ја следат препораката на Европската комисија за скратување на важењето на ковид сертификатите на 9 месеци, а одлуката треба да стапи во сила на почетокот на наредната година.
Холандскиот министер за здравство Хуго де Жонж изјави дека наскоро за целосно вакцинирани лица ќе се сметаат само оние коишто примиле бустер доза од вакцината против коронавирус.
Тоа значи дека Холандија ќе ја скрати важноста на сертификатот за вакцинација од 12 на 9 месеци, а сите кои не го исполнуваат овој услов мора да ги почитуваат дополнителните правила за влез во земјата, пишува SchengenVisaInfo.com.
Според податоците на овој сајт, луѓето коишто не примиле бустер доза ќе патуваат низ ЕУ доколку покажат доказ за негативен ковид тест.
Се очекува дека оваа одлука ќе стапи во сила во февруари 2022 година.
Слично на Холандија, и властите во Чешка оваа недела објавија дека ковид сертификатот ќе трае 9 месеци. Од јануари 2022 година само оние коишто примиле трета доза од вакцината ќе се сметаат за целосно вакцинирани кога ќе дојдат во Чешка.
Во Австрија рокот на важење на вакцината на 6 декември е намален на 270 дена.
Во Израел сертификатот истекува 180 дена по втората доза и посетителите мора да обезбедат да не им истече вакцинацијата додека престојуваат во земјата.
За потсетување, ЕК на 25 ноември предложи рокот на важење на вакцините да се ограничи на 9 месеци, а доколку се изгласа овој предлог ќе почне да важи од 10 јануари 2022 година.
