Во списанието Science е објавен нов извештај за првиот случај на коронавирус во светот.
Ова истражување на научниците ги проучувало јавните извештаи за потеклото на коронавирусот во Кина, а сега сигурно повторно ќе ја отвори приказната за нулта пациентот или лицето коешто прво се заразило со вирусот SARS-CoV-2.
Како што ексклузивно пренесе The New York Times, Светската здравствена организација веројатно згрешила во хронологијата на пандемијата бидејќи новата анализа сугерира дека првиот познат пациент заразен со коронавирус бил продавач на пазарот во Вухан, а не сметководител кој живеел во близина на пазарот.
Мајкл Воробеј, научник и водечки експерт за следење на еволуција на вируси на Универзитетот во Аризона, откри отстапувања во временските рамки копајќи по сè што претходно беше објавено во медицинските списанија, како и по видеоинтервјуата во кинеските медиуми со двајца луѓе за кои се верува дека се првите документирани лица со коронавирус.
Тој тврди дека врската меѓу доставувачот од пазарот на морски плодови Хуанан и најраните хоспитализирани пациенти силно упатува на тоа дека пандемијата почнала баш на тоа место.
„Во овој град од 11 милиони луѓе, половина од нив се поврзани со место со големина на фудбалско игралиште. Многу е тешко да се објасни тој образец доколку се смета дека епидемијата не започнала на пазарот“, вели тој.
Други експерти велат дека Воробеј завршил одлична детективска работа и дека веројатно е во право кога вели дека првата заразена личност била продавач на морски плодови. Но, некои сметаат дека сè уште нема доволно докази за тоа каде и како почнала пандемијата.
