Рускиот опозициски лидер Алексеј Навални, кој беше осуден на две и пол години затвор во февруари, денеска од својата затворска ќелија преку Instagram објави дека е добро.
„Сè е во ред. Во дворот има дури и справа за вежбање”, наведе Навални и додаде дека се наоѓа во затворот Колчугино, источно од Москва.
Противникот на Кремљ истакнува дека тој сè уште не ги добил писмата, а уште помалку знае што се случува во надворешниот свет откако е пренесен од затворот во Москва.
Навални вели дека „убива“ време во ќелијата правејќи двопек на радијаторот со уште двајца затвореници.
„Никогаш не сум мислел дека тоа може да биде толку возбудлива активност. Се надевам дека и вие сте добро и дека не ви е досадно”, додаде Навални, кого го следат 4,2 милиони луѓе на Instagram.
Не е познато како Навални успеал да испрати порака од затвор на социјалните мрежи.
