На синоќешната Met Gala се појави мистериозен маж за кој многумина помислија дека е славниот актер Џаред Лето. Но, луѓето уште повеќе се збунија кога актерот навистина се појави на свеченоста и тоа дури „два“ пати.
По оваа свечена церемонија, популарноста на Џаред Лето порасна уште повеќе. Кога првично на црвениот килим се појави мистериозен маж облечен во необична сребрена креација, многумина помислија дека станува збор за ѕвездата од филмот „Morbius“.
Освен физичките сличности, тоа го помислија и поради модното издание. Но, набргу сфатија дека не станува збор за актерот туку за зад несекојдневното модно издание се крие 36-годишниот моден креатор Фредрик Робертсон, кој на социјалните мрежи себеси се опишува како „моден диктатор и зависник од мода“.
Роберстон, кој е роден во Шведска, за оваа прилика одбра сребрена креација, а многумина беа збунети и го пофалија Џаред за уште едно смело издание.
Иако овој креативен дизајнер воопшто немаше намера да биде заменет со Лето, успеа не само да ги збуни гостите, туку и светските медиумски куќи. Па така, New York Times објави фотографија од Фредрик пишувајќи како „Џаред Лето пристигна на Мет гала“. Набргу потоа ја исправија грешката и се извинија за недоразбирањето.
Дека станува збор за грешка сите сфатија кога Лето подоцна пристигна со дизајнерот Алесандро Мишел со кој имаше иста модна комбинација. Лето и Алесандро се појавија во идентични златни костими и привлекоа доста внимание.
Славниот актер е препознатлив по необичните Met Gala изданија. Највпечатливо негово појавување беше во 2019 година кога на црвениот килим се појави со совршена реплика на неговата глава во раце.