Остатоците од огромната кинеска ракета што испорача нов модел на вселенската станица во земјата во понеделникот се очекува да паднат на Земјата следната недела, соопшти Американската вселенска команда, која ја следи нејзината траекторија.
23-тонската ракета Long March 5B го носеше лабораторискиот модул Wentian во вселената и беше лансирана од островот Хаинан во 14:22 часот по локално време во неделата. Модулот потоа успешно се спои со кинеската орбитална станица.
Меѓутоа, откако ја заврши својата работа, ракетата почна неконтролирано да се спушта кон земјината атмосфера и не се знае каде точно ќе падне. Неконтролираниот лет е вкупно трет за Кина, која веќе е критикувана за лошото управување со вселенскиот отпад.
„Тоа е метален предмет тежок 20 тони. Иако ќе се распадне кога ќе влезе во атмосферата, бројни парчиња, некои од нив прилично големи, ќе паднат на површината", рече Мајкл Бајерс, професор на Универзитетот во Британска Колумбија и автор на неодамнешна студија за ризикот од вселенски отпад.
Вселенскиот отпад претставува исклучително мал ризик за луѓето, но можно е поголемите парчиња да предизвикаат штета доколку паднат на населени места. Бајерс рече дека поради зголемувањето на количината на вселенски отпад, тие мали шанси стануваат сè поголеми. Според проценките, можноста за паѓање на ракетни тела во Џакарта, Дака и Лагос е трипати поголема отколку во Њујорк, Пекинг или Москва.
„Ризикот може целосно да се избегне со оглед на технологијата и плановите за мисија кои овозможуваат контролиран влез во атмосферата, обично преку оддалечените делови на океанот, наместо неконтролиран влез“, рече Бајерс.
Шефот на Канцеларијата за вселенски отпад при Европската вселенска агенција (ESA), Холгер Краг, рече дека најдобрата практика е контролирано да се влегува во атмосферата и да се паѓа во оддалечените делови на океанот секогаш кога ризикот е превисок.
Американската вселенска команда продолжува да го следи падот на кинеската ракета на Земјата, а точната влезна точка во атмосферата ќе биде позната само неколку часа пред тоа да се случи.
Кина минатата година се најде на удар на критиките за својот вселенски отпад, откако лансираше модул на слична ракета. Остатоците паднаа во Индискиот Океан во близина на Малдивите десет дена по лансирањето. НАСА соопшти дека Кина не ги исполнува „одговорните стандарди“. Од друга страна, Кинезите ги обвинија Американците дека „шират страв“.
Во 2020 година, јадрото на кинеската ракета тешка речиси 20 тони влезе во атмосферата неконтролирано, помина директно над Лос Анџелес и Централ парк во Њујорк и падна во Атлантикот.
Вселенскиот отпад како стари сателити влегува во атмосферата секој ден, но не се забележува бидејќи согорува пред да падне на земја. Само големиот вселенски отпад, како што се вселенските летала и ракетните делови, претставуваат многу мал ризик за луѓето и инфраструктурата на земјата.
