Современата адаптација на „Ана Каренина“ ќе биде првата руска оригинална серија што ќе пристигне на платформата за стриминг, пренесува Hollywood Reporter. Новата драма е модерно прераскажување на класичниот роман на Толстој, а Светлана Ходченкова, актерка од филмот „Tinker Tailor Soldier Spy“, ќе ја игра главната улога.
Во ажурирана верзија на Netflix, Ана Каренина ќе биде сопруга на гувернерот на Санкт Петербург, која влегува во љубовна врска со Алексеј Вронски, дрзок наследник на алуминиумска империја. Нивната врска ја загрозува деликатната рамнотежа на нивните семејни врски и социјални односи.
„Ана Каренина“ важи за еден од најголемите романи на сите времиња. Приказната е адаптирана неколку пати на повеќе јазици за филм и телевизија, вклучувајќи ја и верзијата на Џо Рајт од 2012 година кога главните улоги ги толкуваа Кира Најтли како Ана Каренина, Арон Тејлор-Џонсон како Вронски и Џад Ло како Алексеј Каренин.
Роман Кантор, сценаристот на руската хит серија „To the Lake“ која се емитува на Netflix, ќе ја напише модерната адаптација.
„Да се донесе 'Ана Каренина' во Русија во 21 век и да се претстави пред целиот свет на нејзиниот јазик на Netflix е остварување на сонот“, вели Кантор, „Буквално, бидејќи идејата за оваа ТВ серија ми дојде на сон и оттогаш ја бркам“.
1-2-3 продукцијата, со седиште во Москва, ќе ја продуцира серијата, а Кантор ќе ги преземе режисерските должности заедно со Валерија Федорович, Јевгениј Никишов, Наташа Меркулов и Алексеј Чупов. Снимањето ќе се одвива на локации во Москва и Санкт Петербург.
„Неверојатно сме горди што ја најавуваме нашата прва руска серија со продукцијата 1-2-3“, рече директорот на Netflix, Мајкл Азолино, притоа додавајќи: „Талентиран тим писатели, режисери и продуценти создаде замислена и импресивна серија. Возбудени сме што на гледачите во Русија и во светот ќе им ја презентираме својата визија за оваа приказна“.
