Реванш полуфиналето во Лигата на шампионите помеѓу мадридските ривали на прв поглед говори дека ќе биде само формалност за Реал. „Кралскиот клуб“ на првиот натпревар победи со 3:0.
Реал со речиси недостижна предност ќе го почне реваншот на „Винсенте Калдерон“, но Атлетико нема намера лесно да се предаде. Тимот на Диего Симеоне ќе се обиде да го примени рецептот од 2015 година, кога во првенствениот дуел победи 4:0.
Сепак, овој натпревар е одигран во Примера, каде Реал има само една победа над Атлетико на последните осум соочувања, додека во Лигата на шампионите „Кралскиот клуб“ има три победи и едно реми.
Лоша вест за Атлетико е и дека Реал на последните 60 натпревари постигнал најмалку еден гол.
„Пред нас е еден екстремно тежок меч, за некои невозможна задача, но не и за нас. Им кажав на играчите да веруваат, иако играат против најдобриот тим во светот, но ние можеме да минеме во финалето. На нашиот терен секогаш имаме шанса“, рекол тренерот на „јорганџиите“ Чоло Симеоне, во чии состав ќе се врати дефанзивецот Хозе Марија Хименез.
На другата страна никој не помислува дека Атлетико може да приреди сензација. Главна тема на „Сантијаго Бернабеу“ е дали Реал може да стане првиот тим кој ја одбранил титулата во ЛШ.
Полуфиналниот реванш помеѓу Атлетико и Реал на „Винсенте Калдерон“ стартува во 20:45 часот.