Американскиот претседател Џо Бајден е во посета на Ирска, а за време на еден од неговите говори направи гаф кој повторно го врати во фокусот на јавноста и медиумите.
Бајден оствари средба со министерот за надворешни работи на Ирска, Мајкл Мартин, а по средбата следуваше прес-конференција на која им се придружи и ирската рагби ѕвезда Роб Керни, далечен роднина на Бајден.
Во тој момент, Бајден се обиде да ги пофали успесите на Керни и неговите спортски достигнувања, а особено се осврна на победата на ирскиот рагби тим над Нов Зеланд во 2016 година во Чикаго.
Коментирајќи го тој успех, Бајден го измеша прекарот на репрезентацијата на Нов Зеланд All Blacks и британската воена единица Blacks and Tans која се бореше против Ирската Републиканска Армија.
„Тој е пеколен рагбист. По ѓаволите, ги победи Blacks and Tans“, рече Бајден, на што присутните се изнасмеаја.
Инаку, единицата „Black and Tans“ била единица во рамките на британските безбедносни сили кои се бореле против ИРА од 1919 до 1921 година. Конфликтите меѓу овие воени формации им послужија на Ирците да создадат бројни патриотски песни, од кои веројатно најмногу се издвојува „Come Out, Ye Black and Tans“.
По повод гафот на Бајден се огласи и Аманда Слот, функционер на Советот за национална безбедност на САД, која нагласи дека се знае што мислел Бајден.
„Мислам дека веројатно им е јасно на сите во Ирска, особено на љубителите на рагбито, дека претседателот зборуваше за All Blacks и нивниот пораз од Ирска во 2016 година“, рече Аманда Слот.
