Граѓаните на Грац, вториот по големина град во Австрија, предизвикаа политички пресврт со нивните гласови. Имено, на локалните избори во Грац, Комунистичката партија на Австрија (KPÖ) освои најмногу гласови, дури 28,9 проценти, што е зголемување за 8,6 процентни поени.
Кандидатката Елке Кар (59) по победата рече дека анкетите не предвидувале таков успех, но дека за нив ваквиот резултат не е неочекуван.
„Некои даваат ветувања во неделите пред изборите. Ние сме тука секој ден, со години, за луѓето, особено за најсиромашните“, рече таа во интервју за RTL Direkt, објаснувајќи го таквиот успех.
„Имам стара Nokia со физичка тастатура“
Кар зборуваше за Тито и Југославија, како и за себе лично и за односот со граѓаните.
„Мојот телефонски број е ист од 2005 година, имам стара Nokia со физичка тастатура, а не смартфон, но тоа го правам 16 години, одговарам на секој повик, ако не можам сега, тогаш им се јавувам, Одговарам на секоја СМС порака. Се разбира, не можам да им помогнам на сите, но, барем ги сослушувам, можеби малку да им го подигнам моралот, за да знаат дека некој се грижи. Мислам дека тоа е многу важно“, рече таа.
Вели дека нема ништо заедничко со Сталин, но идеите на Маркс ѝ се блиски.
„Има една песна на Џон Ленон, Working Class Hero (Херој на работничката класа), која беше мојата главна мотивација, дека луѓето, без разлика од каде се, без разлика дали се мажи или жени, имаат еднакви можности, треба да избегнуваме неправда бидејќи има луѓе кои имаат ограничени шанси од раѓање. во животот, нивните шанси не се еднакви“, објаснува таа за своите ставови.
„Знам за Тито од детството“
„Деновиве ќе наполнам 60 години и знам за Тито уште од детството, бев во Југославија неколку пати како дете. За мене, таа земја се распадна на најтажниот можен начин. Јасно, не беше сѐ совршено, но Тито беше рамка што го поврзуваше сето тоа, ми се чини дека за време на Југославија не беше толку важно дали сте Босанец, Црногорец, Хрват, Словенец, Србин, имаше рамка која поврзува различни култури, различни религии и токму тоа го направи Тито. Од сите поранешни социјалистички држави во овој дел на Европа, за мене Југославија беше најблиску до мојот идеал“, рече идната градоначалничка на Грац, која веднаш соопшти дека нема да се кандидира на следните избори.
