Најновиот филм за Бетмен, „The Batman“ со Роберт Патисон во главната улога, заработи неверојатни 128.5 милиони долари на бокс-офисот во Северна Америка.
Станува збор за втор филм кој успеа во време на пандемијата да заработи над 100 милиони долари во еден викен. Првиот е „Spider-Man: No Way Home“, со неверојатни 260 милиони долари од премиерното прикажување во декември, 2021 година.
Благодарение на позитивните критики, добриот прием во киносалите и желбата на публиката да го види Патисон како Бетмен, филмот стана комерцијален успех на Warner Bros. Филмското студио потроши 200 милиони долари за продукција и неколку милиони долари за дистрибуција и маркетинг. Оживувањето на Бетмен на екраните не е евтино, а профитирањето нема да биде лесно.
На меѓународно ниво, филмот заработи 120 милиони долари, додека на светско ниво одлични 248.5 милиони долари. Warner Bros. го откажа прикажувањето во Русија поради инвазијата во Украина што се случи минатата недела.
Покрај Патисон, во филмот се појавуваат Зои Кравиц, Енди Серкис, Колин Фарел и други.
На второ место е „Uncharted“ со Том Холанд, филмот заработи 11 милиони во третиот викенд на прикажување. Меѓу првите три е и „Dog“ со заработка од 6 милиони долари.
